انا فاض بي الكيل واتهد الحيل
والصبح أهو راح ف شواشي الليل
الليل بردان .........والكاس مليان
والعين بتغني ......تقول مواويل
لا عرفت أفوت ولا لاقي الموت
الصوت مكبوت والدنيا سكوت
لا انا طايل أكون الديك يا زمان
ولا طايق أعيش... دور الكتكوت
أوجاع بالكوم..... وشماته ولوم
لا أنا عارف أنام وللا حتي أقوم
مطحون يا زمان تحت الأحزان
معجون بالويل ....وبقايا هموم
العيب علي مين يا زمن غدار
علي ليل خواف وللا علي نهار
محشور ف جحور مش لاقي النور
ده العيشه عذاب... والطعم مرار
حقنا علي مين وللا علي مين
علي ناس بتبيع ف البني أدمين
وللا علي ناس مالهاش احساس
بضمير معدوم ...وعيون خاينين
دنيا ...وبتدي ...للي معاه
واللي مش لاقي تناوله الآه
هنلوم علي مين وللا علي مين
ما خلاص الدرس اتعلمناه
********************
بعد غيابك
راجع تاني ...
يارمضان
فاتح بابك
ولأحبابك
جاي بأماني
زي زمان
**************
أهلا بيك
شرفت يا غالي
نور لياليك
والله بيحالي
مستنيك
من مده طويله
ويا العيله
وكل عيالي
بعد غيابك
راجع تاني
يا رمضان
*************
هنوي صيامك
ونوي قيامك
أصل أنا عارف
والله مقامك
فيك الخير
للناس والطير
شهر البركه والاحسان
بعد غيابك
راجع تاني
يا رمضان
*************
فيك الرحمه
للي طلبها
جنة ربك
للي حاببها
واللي يخبط
يوم علي بابها
فيك هينولها بالإيمان
بعد غيابك
راجع تاني
يا رمضان
***************
ربنا قادر
يغفر لينا
لما نصومك
هينجينا
يصلح حالنا
وحال أهلينا
زي ما قال
ف السنه نبينا
سيدنا محمد العدنان
بعد غيابك
راجع تاني
يا رمضان
************
هنقول وحوي
حلو يا حلو
بعد ما أهل بلدنا
يصلوا
بعد ما نفطر
وسط جرانا
بعد ما أكلوا
كنافه وحلو
فضلة خيرك
يا رمضان
**************
بعد غيابك
راجع تاني
يا رمضان
فاتح بابك
ولأحبابك
جاي بأماني
زي زمان
عنوان الموضوع: "انا فاض / بعد غيابك بقلم /رضا أبو الغيط Harafish"
إرسال تعليق