بأخاف منك
-----------
بعدني شيطاني عن دربك
ولهّاني بزيف وخداع
حزين والقلب فيه حبك
يصبرني علي الأوجاع
-----------------------
يا عالم نفسي عن نفسي
وكاتب في الخفا قدري
يا مالك يومي وأمسي
وخالق سري من بدري
----------------------
باخاف منك وبرجعلك
بكل جوارحي وبرسمي
بحن اليك وباسمعلك
بكل دقيقة في جسمي
-------------------------
حنانك ليا أقربللي
يا خالق الفضا أسرار
ودي دعوة فتسمحلي
تنجيني عذاب النار
------------------------
بأخاف منك
************************
بحبك ولكن !
------------
بحبك ولكن
ف حبك حرام
ألاقي مصيري
هواجس منام
وأوصف في شكلك
وطينك وأرضك
وعايش معري
داريني بعرضك
كفاية أرحميني
لغربة تبعيني
قتلتي الأماني
ومات الكلام
يقولوا منارة
وأم الحضارة
وأبصر عبارة
وأرض السلام
لكني بشوفك
تداري في خوفك
وبألمح كسوفك
ما بين الأنام
غريب جوا منك
وسأمعك كأنك
بتضحك عيونك
بكل إنسجام
فقولي بصراحة
وحبة بجاحة
في سوق النخاسة
باعوكي بكام !؟
بحبك ولكن !
***********************
رباعيات(جابرسليمان)
------------------
قالوا زمان في المثل
كل الحاجات مقادير
والدنيا في أصلها
مبنية ع التغيير
--------------------------
الدنيا شبه الريح
تيجي بدون تصريح
ان كنت واد فهّيم
اسلك طريقها صحيح
---------------------------
ياللي ابتديت بالغلط
فجأة ولسانك فلت
لما أنتٓ بيتك قزاز
تحدفني ليه بالزلط
------------------------------
إنسان عديم الشوف
جاهل بهيم حلوف
تشوفه زي الأسد
وف قلب بيتو خروف
-------------------------------
الكبر من صنعته
والكدب في نعرته
والأصل انه حقير
مفتون قوي بدنيته
*************************
أصلها دنيا
*********
أوعي تفكر
إنك مالك
كل حياتك
كده بالغظب
أصل الدنيا
اللي بتعشقها
كل ما فيها
صعب ف صعب
سلعة رخيصة
واللي بيكسب
واد حريف
ف اصول النصب
ممكن تبقي
معلم فيها
لو تتخصص
قسم الكدب
أو ديساك
بكعوب رجليها
لو أعلنت
عليها الحرب
تجمع مرة
تطرح بره
كل حاصلها
قسمة وضرب
والمتنوّر
فيها مضلم
دنيا وفانية
وكلها غلب
أصلها دنيا
************************
لروح الشهيد (أحمد فتحي)
(أبو عمّار)
عامل أيه ؟
،،،،،،،،،،،،،،،،،
أيه أحوالك
طبعًا مبسوط
وإن شالّه يارب
تكون مرتاح
أنا لما بفكر فيك
تيجي الصورة
في أيها وقت
مسا وصباح
بلاقي الكون
نسمة جميلة
في وسط براح
شايف حواليك
جناين ورد
انت بتحلم
وهيّا ترد
وبتتمني بسرعة تكون
أي أمنية
أيها حلم
حقيقة وجد
أضحك أضحك
زي ما كنت
معانا بتضحك
بس بقولك
مين زيك
كل الناس
تتكلم عنك
كل الناس
فاكراك موش ناسية
احنا في دنيا صعيبة وقاسية
وانت ف جنة
قول واتمني
عايش جوا
حواصل طير
خضر جميلة
تحب الخير
جنة بديعة
ف وسط انهار
وانت عريسها
يا أبو عمّار
عامل أيه ؟
*****************************
كسّر كل قيود الخوف
----------------
حرر نفسك من أطماعك
انسي همومك مع اوجاعك
مهما صعاب الدنيا هتاخدك
بكره الصعب يكون مألوف
كسّر كل قيود الخوف
دنيا غريبة ..حالاتها مريبة
دايمًا ترفع في الهليبة
وأما تكشر تبقي كئيبة
اضحك وافرح ولا تتألم
خلي البسمة طريق معروف
كسر كل قيود الخوف
مهما تجف معاني الحب
مهما تزيد أحزان القلب
لو مليانه حياتك غلب
لسه الدنيا من حواليك
فيها طريق الخير معروف
كسّر كل قيود الخوف
كونك واسع ماله حدود
ازرع جوّا احزانه ورود
لون كل ايامه السود
أوعاك تيأس ولّا تسلم
تلقي الفرح طريق مكشوف
كسّر كل قيود الخوف
عنوان الموضوع: "بأخاف / بحبك / رباعيات / أصلها دنيا / عامل أيه ؟ / كسّر / جابر سليمان Break"
إرسال تعليق