هلوسات
……………………………………
قلت فيكي كل حاجه
رغم إني لسه شايف
فيكي حاجه متقالتش
أصلِك إنتي رغم موتِك
فيكي حاجه منتهتش
لسه بتعافر سنينِك في الوريد
رافضه كونِك حد ميت
رافضه كونِك حب مات
رافضه إنك تبقي صفحه بتنطوي
فوق كتاف الذكريات
حِلمِك المدفون في قبره
تحت منك وقته فات
والأرض بايره من سنين
ف متحصديش منها السراب
ولا تشربيش من نبع جف
ولا تحسبيش الشمعه تقدر تدي نور
ودموعها غرقانه إغتراب
إبني مم وهمِك قصور
واسرحي جوه المداين
واطلعي فوق المآذن
واندهي علي شمس تاهت في انعكاسها
ما انتي لسه بتحلمي تبقي الحقيقه
جوه برواز الصور
لساكي بتناطحي السحاب اللي ف خيالِك
لجل ما تشوفي القمر
دي الغيمه غطت ع المشاعر
وانتي لسه بتحلمي بصوت المطر!!
لساكي بتحايلي الدفا وقت الشتا
وبتطلبي منه السماح
واقفه في المحراب تصلي وبخشوع
وبتندهي علي عُمر راح
بتجمّعي من وسط كوم الوهم ليه حبة حاجات
وبتعملي منها حكايات
وتصدقيها بمنتهي كل الغباء
وانتي عارفه انك عناء
كنتي ذنب إحتاج لتوبه في ابتلاء
كنتي آخر حد يدي الإنتماء
لسه فاضل فيكي حبة هلوسات
عايشه جنب الحيط في ضِلِك
بيداريها الليل في ذُلِك
أيوه رافض كبريائي يسمعِك
رغم إني بعترفلِك
لسه باقيه حاجه منك
…………………………………………
كلماتي/ العندليب ( أيمن عبده )
عنوان الموضوع: "هلوسات / كلماتي/ العندليب ( أيمن عبده )"
إرسال تعليق