واحد ع المعاش
ليه المزاج ماهوش معدول
والبال معكنن مش رايق
م الصبح وانا بالى مشغول
قاعد لوحدى ومتضايق
مايكونش اعراض نفسيه
محتاجه اروح عند الدكتور
واللا دى حاجه عرضيه
يوم والا ساعات ويعدى الدور
الحاله واضحه ولها اسباب
اتنين تلاته وتتعدى
زهق البيوت وصاحب كداب
وضمنها برضه الماده
مانا اصلى يعنى طلعت معاش
وقعدتى فى البيت فاضى
وبافتكر شغلى ولا انساش
دلوقتى بين احفادى قاضى
وجع الدماغ من لعب عيال
وجنب بيتى بالكوره
والصحه نحمده ماهيش عال
وحالتى طبعا مستوره
وارجع واقول انا برضه تمام
وادينى احسن من غيرى
عقلى يقول لى بتقبض كام
ياافندى يابو وظيفه ميرى
يعنى اربعين سنه فوقها اتنين
خدمت فيكى ياحكومه
واخرج معاش القى القرشين
ماينفعوش اكل لبومه
وانا اللى كنت ف شغلى مدير
وماهيتى عاليه كبيره
وحتى برضه ان كنت وزير
لازم بقى نفضها سيره
عرفت ايه هى الاسباب
ياصاحبى لازم تعزرنى
ولو قاطعتك او فيه غياب
خليك اصيل وتعالى زرنى
احمد عبد الوهاب ابن بيرم فى٦\٤\٢٠١٦
عنوان الموضوع: "احمد عبد الوهاب ابن بيرم فى٦\٤\٢٠١٦ واحد ع المعاش"
إرسال تعليق