معجون بصحيح من نفس الطين
لا أنا عب رحمن وللا حتي
جاهين
أنا لسه يا دوب بتهجي الشعر
وف بحره غريق وبقالي يومين
بيلفوا بكل المكريفونات
ويقولوا الولد خلاص أهو مات
معرفش أزاي أنا ليه أو كيف
الكلمه ف حلقي صابها سكات
بيقولوا الدفنه بعد ساعات
والعزا كان قاصر ع الكلمات
ف صوان منصوب وف قلبه ديوان
ما هو عب رحمن الغالي أهو مات
أنا قلت يا ناس كان صابكو جنان
وللا أنا مش فاهم أو خرفان
ازاي بتقولوا الشاعر مات
د الموت ما بيعرف ...عب رحمن
معقوله يا ناس الشعر يموت
معقوله الشمس تروح ما تجيش
معقوله الكلمه يشيلها تابوت
وأسأل ع الصبح يقولوا مافيش
معقوله يا فاطمه الورد يموت
والحزن هيملا غيطان وبيوت
طب نشكي لمين ولفين هنروح
لو فاتنا ومات كده شجر التوت
طب مين هيصب لأمنه الشاي
ويجيب لولادنا الصبح الجاي
طب مين راح يممسح دمع العين
ويفرح حزن آهات الناي
د أنا كنت معاه ومعانا أبو زيد
ووهيبه ف إيدها مقشه جريد
إزاي بتقولوا الشاعر مات
وكلامه بيطرح ليلة العيد
كلمات / رضا أبو الغيط
عنوان الموضوع: "د الموت ما بيعرف ...عب رحمن / كلمات / رضا أبو الغيط"
إرسال تعليق