غنوة حب
----------
البحر ويا النيل
بيغنوا غنوة حب
يتلاقوا بعد غياب
رغم الفراق الصعب
ولُقا الحبيب المسافر
له دقه تهز القلب
وفوق شطوط الحنان
نامت عيوني سنين
أصحى وانام على صوت
موجك ومواويلك
ونور فنارك ينور
مع القمر ليلك
وجوا نني العيون
صوره لجمال نيلك
على شطه أحلى صبايا
تمشي وتتمخطر
والمشيه تكه بتكه
غزال بيتغندر
الدم خِفّه ونقاوه
آه ياعيني ع السكر
عيون سوده وكحيله
ورموش مَحَنْيّه
أحلى ماشافت عين
سبحانه مين صور
يانيلي شطك حكاوي
وغناوي ع الأرغول
والصُحْبه طول الليالي
نقعد نعيد ونقول
مغنى يهز الشراع
من سلطنة موال
ودقة الطبال
ورنة الأرغول
ودمعة المزمار
والموج يصول ويجول
نور الفنار يسحره
بِطَلّه م العالي
وشط بره ياعيني
لقلبي يحلالي
أغيب وارجع واحن
للقُرب والصحبه
ويا الدفا والحضن
وشطوطك الرحبه
ياأحلى مافي الكون
عيوني عناوينك
أنت الحبيبه يابلدي
فى القلب شايلينك
ليلى فوده
عنوان الموضوع: "غنوة حب بقلم / ليلى فوده "
إرسال تعليق